Heystfagnaður 2007 Tíðindaskriv, 9.okt 2007
Skríðandi, tysjandi, froysandi náttúra!
Mánadag til fríggjadag, 15.okt – 19.okt, kl 11 - 16
Føroyska náttúran er rík og fjøllbroytt. Á landi, í havinum, í jørðini. Tað ræður bara um, at vit hava eyguni við okkum. Veitst tú, at tað finnast meir enn 80 ymisk sløg av eiturkoppum í Føroyum og meir enn 100 sløg av flugum? Kanska ert tú heppin og finnur eiturkoppin ella klukkuna, sum hava fjalt seg á heystfagnaðinum. Um tú torir!
Náttúrugripasavnið á Debesartrøð og Sjósavnið í Sandágerði bjóða øllum børnum og vaksnum til hugtakandi upplivingar og stuttligar uppgávur alla heystfrítíðina. Leitið eftir plantum og steinum! Leitið eftir skriðkyktum, fiskum, krabbum og krossfiskum! Summi hava enntá fjalt seg úti í grasinum ella uppi í trøunum.
Sum nakað heilt nýtt eru nakrar gátur, sum bert kunnu loysast um børn og vaksin í felag hjálpa hvør øðrum. Vit skulu ikki avdúka fleiri loynidómar, men bert siga, at tann vaksni megnar ikki einsamallur at loysa uppgávuna!
Heystfagnaðurin er felags átak hjá Jarðfeingi, nýggju Umhvørvisstovuni og Sjósavninum.
Opið er kl 11mánadag 15.okt til fríggjadag 19.okt. Kl. 11 til kl. 16
Náttúrugripasavni ókeypis atgongd
Sjósavnið kr 30 fyri vaksin og kr 15 fyri børn
Prísirnir á sjósavninum eru bert galdandi frá mánadag til fríggjadag í heystfrítíðini
9.oktober 2007
Jarðfeingi, Umhvørvisstovan og Sjósavnið
